一首埋藏於床下底多年的隱世作品----『捱 (Suffer) 』暨 MV
小弟自幼喜歡流行音樂，長大後，對搖滾Band sound更有莫明偏愛。
約七年前，曾立志要發表一張唱片去還自己一個心願，
於是找來舊有Band友，小弟負責曲詞唱，他負責編曲及演奏，
在本人並無任何正統音樂和歌唱訓練、及友人有限的音樂根基底下，
兩個二打六，希望可以創造一張屬於我們的CD。
曾經有好多朋友問我：
你係咪想做明星呀?!
你想出唱片賺錢呀?!
..........我真的無言了......
其實，我只想去為自己圓一個搖滾夢，目的就是如此簡單...
約花了一年時間，小弟寫了十首作品，時間日復日過，
經過幾許辛酸喜怒哀樂及金錢付出......,到七年後的今天，
小弟現正式向各大鄉親父老隆重宣佈，本人的搖滾大碟........
仍然胎死腹中!!
哈哈~~~當中種種未能完成的原因，不提也罷了....
在十首劣作中，『捱』此曲是在2003年寫的，除了是本人心聲之外，
當年也正值沙士及金融風暴時期，此曲也恰巧配合了市面上『捱世界』的氣氛。
到今天2009年，不幸再來了一個金融海嘯，『捱世界』的氣氛再次湧現，
令本人心底再次泛起此曲，並突然忽發奇想，好想襯小弟牛一之期，
將此曲於床下底塵封中出土，公諸於世，
當是送給自己的生日禮物之餘，也當是還自己十分之一個搖滾夢....
而此MV，是本人多年好友Sam Chan兄的作品，
Sam兄製作此MV，小弟真的十分滿意，
風格異常配合本人曲風及怪異性格，真的令小弟劣作猶如乞丐披上龍袍，
順帶一提，此MV亦曾於2005年第十屆香港獨立短片及錄像比賽--動畫組當中，
成為11段入圍作品之一，在此真的要再一次隆重多謝Sam兄，多謝!!
當然，也要多謝編此曲的Joe兄，多謝!!
最後，將此劣作獻給各有緣及須要『捱世界』的知音人，共勉之。
第十屆香港獨立短片及錄像比賽場刊中的簡介
捱 (Suffer) MV
捱 (Suffer)
曲詞唱: Nick
編: Joe
唔係你嘅就唔係你 谷鬼氣 賭馬又衰收尾
唔係你嘅就唔係你 搵嘢做 份份又做到死
唔係你嘅就唔係你 租間房 四Bone牆一張被
唔係你嘅就唔係你 捱到死 都係得三千幾
當天聽過一首歌 講過七分本領三分靠運氣
事實卻係三七倒轉喎 令我心中百般滋味
今天心裡一把火 點解我一生冇運氣
我與拼搏膊碰膊 實在沒有選擇餘地
唔順氣就係唔順氣 天生佢 有僕人執手尾
唔順氣就係唔順氣 佢老竇 淨落大份任佢Waste
唔順氣就係唔順氣 揸寶馬 載兩條女睇戲
唔順氣就係唔順氣 成個房 大過維園草地
窮係你但係唔服氣 皆因你 重有份骨氣
窮係你但係唔服氣 儘管你 拼了老命去飛
窮係你但係唔服氣 今天你 你要學識爭氣
窮係你但係唔服氣 唔怕你 要捱到九張幾
天保佑你
